تندرست شہری – صحت مند معاشرہ

​علاج – ایک بنیادی حق

صحت مند زندگی سے ہی صحت مند معاشرے کا  قیام عمل میں  آتا ہے۔ اپنی صحت کا خیال رکھنا جہاں ایک شہری کی ذاتی ذمہ داری ہے وہیں حکومت کی یہ بنیادی ذمہ داری ہے کہ وہ  ہر فرد تک صحت کی معیاری ، بنیادی اور آسان سہولیات کی فراہمی کو یقینی بنائے۔ یہ مجموعی طور پر صحت مند معاشرے کے قیام کے لیے بہت ضروری ہے۔ بڑھتی ہوئی غربت میں معالجے کی بلاتخصیص مفت فراہمی ایک اہم اور بڑا چیلنج ہے۔ اسی لیے ترقی پذیر ممالک میں  صحت کی بنیادی سہولیات کا فقدان ہے جس کے نتیجے میں انسانوں کی اموات میں عمر کے حساب سے ایک تناسب سامنے آیا ہے جیسا کہ پاکستان میں  66.38 سال تک انسان کے زندہ رہنے کا تناسب ہے اسی طرح افغاستان میں 60.72 سال، بنگلہ دیش میں 72 سال، انڈیا میں 68.35 سال اور افریکی ممالک میں اوسطا 62.75 جبکہ آسٹریلیا جیسے ترقی یافتہ ملک میں 82.45 سال ہے۔

بد قسمتی سے غریب ممالک میں صحت کا حال بہت افسوس ناک صورت حال اختیار کر چکا ہے جہاں ناقص انتظام کے باعث حکومتی ادارے اپنی ذمہ داری صحیح انداز میں ادا نہیں کر پا رہے ۔ایک اہم وجہ سٹاف کا کم اور غیر تربیت یافتہ ہونا بھی ہے۔ ایسی صورتحال میں ایک غریب آدمی  اپنی صحت کو بچانے کے لیے بعض اوقات اپنی ساری جمع پونجی لگا بیٹھتا ہے اور امیر آدمی دولت کی بنیاد پر بہترین سہولیات حاصل کر لیتا ہے۔ اسی لیے غربت اور خراب صحت کا آپس میں چولی دامن کا ساتھ ہے۔ غربت ہمیشہ نئی بیماریوں کو جنم دیتی  ہے اور اس کے تدارک کے لیے غربت ہی رکاوٹ ہے۔  جس کے باعث ہر سال اموات میں  ہوش ربا اضافہ دیکھنے میں آتا ہے۔